انت بركم وانا نفهم...

القضية ديال هاد أنفلونزا الخنازير فشكل, قصة انتشار الوباء


فالعالم أصلا دايرة بحال شي فيلم من أفلام هوليوود,بدات


باكتشاف أول حالة في واحد الفيرمة ديال الخنازير بالمكسيك,


شوية الفيروس بدا كينتاشر فالعالم كلو بواحد الشكل سريع, تم


تماكين ناضت منظمات الصحة العالمية هي والحكومات شعلو البولة


الحمرا, وطلقو صفارات الانذار بأنه راه كاين واحد الخطر كيتهدد


البشرية وبأن القضية حامضة, وخلقو الرعب فالعالم, والقنوات


الفضائية لقات فالموضوع مادة للاستهلاك الإعلامي, وزادت فيه كاع


, وولا بنادم مخلوع غير بوحدو, سيرتو هادوك اللي مقفرينها دنوب


من عند سيدي ربي وكيخافو من الموت بزاف.


ماعلينا,القصة ديال الفيروس واخا هكاك كتخلي بنادم يشك


فالقضية, ويبدا يطرح فالأسئلة, ويدير هاديك الفرضية ديال ممكن


يكون هاد الشي كولو غير قوالب, ولا الفرضية المعاكسة ديال


يكون بصح كثر من لقياس, مثلا شي مخطط كبير طلقوه شي وحدين من


صحاب "أنا راسي" باش يخدمو المصالح ديالهوم الشخصية..


المشكل أن الفيروس كاين, والناس كيموتو بيه فعلا, فالمغرب أو


غيرو, واخا نسبة الوفيات كتبقا قليلة بالنسبة لعدد الإصابات,


لكن الناس العاديين ولاو يخافو من العدوى, وولا اللي عطس


حداهوم كيهربو منو بحال إيلا غادي يقلع ليهوم ضربة ركنية.


الدراسات أتبثت أن الجينات ديال هاد الفيروس هي جينات فيروس


قديم بان عام 1918, مخلطة مع جينات أنفلونزا الطيور, وشي


مصيبة كحلا من جينات فيروس H3N2 , هاد المعطيات خلات بعض الناس


المختصين فأميريكا يحلفو ليمين إيلا هاد الفيروس مصاوب


فالمختبر, وصرحو بواحد الجرأة نادرة بأن شي ناس -وبالضبط شي


شركات أدوية- طلقوه بلعاني ونشروه فالعالم باش يدخّلو الفلوس


صحيحة عن طريق بيع اللقاح, وشي وحدين خرين شدهوم الحماس


منهوم إعلاميون كبار فالميريكان وصرحو أنه بالإضافة للفلوس


اللي غادي يدخلو هاد الناس راه غادي تكون عندهوم حتى القوة


باش يتحكمو فالجنس البشري, اللي غادي يكتاسبوها عن طريق إضعاف


المناعة عند الملايين من الناس اللي غادين ياخدو اللقاح,


بيناتنا هاد المخطط ديال السيطرة على العالم كيبان بحال شي


سيناريو ديال فيلم ديال رسوم متحركة ,ولكن بيناتنا عاوتاني


راه ماكاينش شي تفسير آخر.


نرجعو للقاح, الناس كتجيهوم شوية عجب كيفاش طاحو العلماء على


الدوا ديال رواح الحلوف فهاد الوقت القياسي اللي مكيتجاوزش


شهرين, وأنفلونزا الطيور اللي كاينة شحال من عام هادي مالقاو


ليها دوا, وحتى الرواح العادي راه اللقاح ديالو ماشي وقائي


100%.


ماعلينا, خصنا نعرفو بأن شركات الأدوية اللي تكلفات بانتاج


كميات كبيرة جدا ديال اللقاح عطاوها وقت قليل باش توجد ليهوم


البرودوي, وباش تربح الوقت ولفلوس كتستعمل هاد الشركات مواد


مساعدة أو محفزة باش تصاوب كمية مركزة كتكفي لبزاف ديال


الناس, الناس المختصين فالشّيمي والبيولوجي كيكولو أنه كاين


بزاف المواد الآمنة اللي ممكن تستعمل كمحفزات بهاد الشكل, لكن


هاد شركات الأدوية أصرّت أنها تدير مواد ضارة, بحال مادة


السكوالين, وهو اللي مالقاو ليه الناس المختصين تا تفسير سوى


أن هاد الناس ناويين على خزيت.


مادة السيكوالين -غير باش نعرفو- هي المادة اللي كتنتج


الهرمونات الجنسية بالنسبة للراجل ولمرا, وهي مهمة بزاف


بالنسبة لعمل خلايا الدماغ بشكل جيد, ودابا إيلا دكّ الواحد برا


فيها السيكوالين, غادي تكون عندو استجابة مناعية ضد هاد


المادة الحيوية فالجسم, يعني الجهاز العصبي غادي يتضرر وتقدر


توقع شي مضاعفات خطيرة الله يحفظ


بالإضافة للسيكوالين كاينة واحد المادة أسميتها الثيمروزال


(Thimerosal) و وهي مادة حافظة فيها الزئبق لي هو المسؤول


الاساسي عن التسمم العصبي اللي كيدير مرض التوحد ديال الدراري


الصغار وكيخروج على الأجنة, وهاد الشي زعما راه النساء


الحوامل و الأطفال هوما اللولين اللي كتوصي منظمة الصحة


بتطعيهم أولاً .. يعني القضية حامضة..


في فبراير 2009, اللول ديال هاد العام, قامت شركة "باكستر"-


اللي هي وحدة من الشركات لكبار ديال الأدوية فالعالم- بتصنيع


لقاحات ديال الأنفلونزا الموسمية ل 18 دولة فالعالم, اللقاحات


كانو ملوثين بفيروس أنفلونزا الطيور الحي, بالصدفة الحكومة


التشيكية دارت اجراء اختبار روتيني للقاح قبل ما تلوحو


الأسواق, و كلفات شركة "بيوتيست" باش تديرلاختبار, الشركة


المكلفة جرباتو على شي فيران ديال المختبرفي خطوة روتينية,


المصيبة أن الفيران ماتو كلهوم الغد ليه, الحكومة التشيكية


دارت حالة استنفار ديك الساعةو علمات الدول لخرى باش تفادا


وقوع الكارثة,غير الله حفظ وصافي.


الغريب فالقضية أن واخا شركة "باكستر "دارت هاد الخطأ الفادح


والفاضح مسحبوش منها الترخيص ديالها, بل نزيدكوم أنها من بين


الشركات اللي عطاوها تصنع لقاح أنفلونزا الخنازير بكميات


كبيرة فهاد الشهور اللخرة.

في انتظار ردودكم القيمة لتدعيم كتاباتي...

شكرا على الموضوع

مشكور على الرد

لا شكر على واجب

شكرا

شكرا علي موضوعك القيم
في إنتضار جديدك